Récor de participación na carrera escontra'l cáncer con 2.200 participantes   

Saavedra destaca la importancia de la detección prematura y tratamientos menos invasivos

Más de 2.000 persones participaron esti domingu na VII edición de 'Uviéu, en marcha escontra’l cáncer', ente elles la conseyera de Salú, Concepción Saavedra, que’l mes de setiembre pasáu acabó, dempués de dellos meses, un tratamientu oncolóxicu.

Entamada pola Asociación Española escontra’l cáncer, l’oxetivu d’esta carrera ye dar visibilidá a esta entidá y a la situación actual del cáncer y amosar la necesidá de sofitar y esixir más investigación nesti campu.

Con salida de la plaza de la catedral y un percorríu de cinco kilómetros pel centru d’Uviéu, los participantes na marcha apurren ocho euros con esi envís.

Saavedra amosóse satisfecha de que la participación medrare al respective de la marcha de 2023 y alvirtió que ye rellumu de que la parte de sensibilización y concienciación de la xente ta funcionando.

La titular de Salú destacó, amás, la importancia de facer una detección prematura y de poder cuntar con tratamientos menos invasivos pa un meyor pronósticu y una mayor supervivencia.

Según Saavedra, el sistema sanitariu asturianu ye "punteru, con tecnoloxíes mui avanzaes" y anovaes nos dos últimos años que dan pie a facer esos diagnósticos más tempranos y a tratamientos menos invasivos.

Al empar, pidió a la población que participe nos cribaos de mama, colon y cuellu uterín que fai’l Serviciu de Salú y que dexaron na última década baxar la mortalidá un 25% nel cáncer de mama y un 20% nel de colon.